Tónlist og náttúran

Thu, 19 May 2011 08:38:36 +0000

Í samvinnu við prófessor Dr. Annette Kreutziger-Herr prófessor við Hochschule für Musik í Köln í Þýskalandi <http://www.kreutziger-herr.de/>, Helga Jónsson kennara við Listaháskóla Íslands og Sigfríði Björnsdóttur hjá Íslenskri tónverkamiðstöð skipuleggur Tónlistarsafn Íslands ráðstefnu um tónlist og tónlistarrannsóknir undir yfirskriftinni „Music and nature“. Til ráðstefnunnar verður boðið 16 fyrirlesurum víða að úr heiminum auk nemenda og kennara í tónvísindum. Ráðstefnan verður haldin í Salnum í Kópavogi dagana 19. og 20. maí 2011.

Nánari upplýsingar verða birtar síðar á heimasíðu safnsins og með opinberum tilkynningum.

Íslensk þjóðlög

Wed, 2 Jun 2010 15:56:54 +0000

Ýmsir vanir ein- og kórsöngvarar hafa heimsótt okkur að undanförnu til að taka þátt í því að syngja inn lög úr bókinni Íslensk þjóðlög sem séra Bjarni Þorsteinsson tók saman. Verða allar upptökurnar, ásamt nótum af lögunum, frummyndum úr handritum og uppskriftum séra Bjarna birtar með hverju lagi fyrir sig. Þessar upptökur munu birtast í Ísmús gagnagrunninum.

Hér má sjá dæmi um upptökurnar.

Krísuvíkurkirkja

Wed, 13 Jan 2010 08:56:43 +0000

Ýmsir aðilar hafa skrá sögu kirkjunnar á Netinu sem og örlög hennar. Hér má sjá dæmi:

Frétt á heimasíðu Ríkisútvarpsins

Vönduð mfjöllun og upplýsingar á Ferlir.is

Þá hefur Tónlistarsafn Íslands gert lítið myndband um kirkjuna með þeim myndum sem við tókum þegar við vorum á ferð okkar þar í maí 2007 og svo að morgni 2. janúar 2010 eftir að kirkjan brann. Blessuð sé minning hennar.

Myndbandið gerði Ingólfur Arnar Björnsson starfsmaður safnsins en tónlistin sem leikin er undir er tekin með leyfi listamannsins af disknum Orgelverk aldinna meistara, í flutningi Kjartans Sigurjónssonar. Verkið heitir Canzona eftir Andrea Gabrieli og er leikið á orgel Kópavogskirkju.

Frásögn Stöðvar 2 af brunanum:

Tónmenning Vesturheims

Tue, 14 Jul 2009 11:02:20 +0000

Stytta við höfnina í Blain, Washington til minningar um þá er vakað hafa yfir Blain. Sjá má í hleðslusteinum umhverfis styttuna nöfn fjölda íslendinga sem veittu verkefninu stuðning.

Frá forsöngvara til organista

Mon, 13 Jul 2009 14:21:55 +0000

Einn af mikilvægustu þáttum í upphafsþróun íslenskrar tónmenningar um og eftir aldamótin 1900 er starf forsöngvara og organista í íslenskum kirkjum. Þeirri miklu breytinu er varð á lagavali við guðsþjónustugjörðina við komu orgelanna hefur ekki verið gerð nógu góð skil, hvað þá þeirri viðhorfsbreytingu er varð við að skipta frá foröngvara til organista. Tónlistarsafn Íslands vinnur nú að því stórverkefni að skrá þessa sögu, þ.e. sögu kirkjuhljóðfæranna og þeirra er héldu uppi söng í íslenskum kirkjum frá upphafi.