Sýningar safnsis

Fúsi á ýmsa vegu

Sat, 8 May 2010 00:00:00 +0000

Sigfús Halldórsson, tónskáld og listmálari, fæddist í Reykjavík 7. september 1920 og ólst upp á Laufásvegi 47.
Þriggja ára sat Sigfús við píanóið og lék eftir eyranu öll lög sem hann heyrði. Átta ára hóf hann nám í píanóleik; fyrst hjá Önnu Pjeturss en síðar hjá Katrínu Viðar og Sigurði Ísólfssyni. Þá var Sigfús einn vetur við nám í Tónlistarskólanum í Reykjavík. Söng lærði Sigfús hjá óperu-söngvaranum Pétri Á. Jónssyni.
Innan við tvítugt hóf Sigfús að skemmta fólki um allt land með söng sínum og píanóleik. Sigfús varð ungur einn af okkar ástsælustu dægurlagahöfundum, en meðal þekktustu laga hans eru: Litla flugan, Vegir liggja til allra átta, Lítill fugl, Í dag, Tondeleyó, Við eigum samleið, Dagný og Játning.
Sigfús lauk prófi í leiktjaldamálun frá Slade Fine Art háskólanum í London árið 1945 og gerði í framhaldi af því leikmyndir fyrir Iðnó og Þjóðleikhúsið. Sigfús var einnig afkastamikill listmálari. Húsa- og götumyndir hans frá Reykjavík og Kópavogi eru mörgum kunnar.
Í tilefni af 90 ára fæðingarafmæli Sigfúsar er í undirbúningi að gefa út sérstaka viðhafnarútgáfu á tónverkum hans sem áætlað er að komi út á afmælisdaginn.

Sýningin stendur fram í desember 2010.

Íslenskir jazz-, rokk- og blúsgítarar

Tue, 3 Nov 2009 17:25:11 +0000

Sýningin opnar 3. nóvember kl. 16.00 og stendur í 14 daga. Hún verður opin alla dagana frá kl. 14.-22.00

Ómetanlegt sjálboðaliðastarf fór fram við uppsetningu þessarar sýningar, og má þer helsta nefna, fyrir utan Gunnar Örn gítarsmið og Björn Thoroddsen gítarleikara, þá Þórð Árnason, Óttar Felix Hauksson og Jóhann Ísberg.

Opnun sýningarinnar hófst á því að Bjarki Sveinbjörnsson, forstöðumaður Tónlistarsafns Íslands bauð gesti velkomna og í framhaldi af því ávarpaði Ármann Kr. Ólafsson forseti bæjarstjórnar Kópavogs gesti og opnaði sýninguna formlega.

Með hverjum mun sem á sýningunni stendur er upplýsingaspjald, en þau má sjá hér á síðunni. Við að tvísmella á myndirnar stækka þær svo hægt er að lesa textann.

Heilbrigð æska - pönkið og kópavogurinn 1978-1983

Sat, 19 Sep 2009 17:37:56 +0000

Fréttatilkynning frá Kópavogsbæ:
Heilbrigð æska“ – pönkið og Kópavogurinn 1978 – 1983

Á morgun, laugardag [19.september 2009] , verður opnuð sýningin „Heilbrigð æska“, pönkið og Kópavogurinn 1978 – 1983.

Sýningin verður opnuð kl. 15.00 í Tónlistarsafni Íslands við Hábraut 2 í Kópavogi (www.tonlistarsafn.is). Sigurrós Þorgrímsdóttir, formaður lista- og menningarráðs Kópavogs, ávarpar. Ómar Stefánsson, formaður bæjarráðs, opnar sýninguna og Dr. Gunni segir nokkur orð um pönkið í Kópavogi.

Klukkan 15.30 hefjast tónleikar í ungmennahúsinu Molanum, sem er í sama húsi og Tónlistarsafnið, þar sem gamlar pönkhljómsveitir í bland við nýjar troða upp. Að loknum tónleikunum er gestum velkomið að ganga niður í gömlu undirgöngin sem verða opnuð á ný í tilefni af sýningunni.

Tilgangur sýningarinnar er að varpa ljósi á pönkmenninguna sem myndaðist í Kópavogi á árunum 1978– 1983. Auk þess verður farið yfir sögu pönksins á Íslandi og verða munir frá tímabilinu almennt til sýnis í safninu. Sýninguna styrkti Lista- og menningarráð Kópavogs en sýningarstjórn er í höndum Aðalheiðar Erlendsdóttur og Péturs Ólafssonar.

Pönk og Kópavogur eru tengd sterkum böndum. Hljómsveitin Fræbbblarnir var stofnuð í MK veturinn 1978 með tónleikum á fyrstu Myrkramessu skólans. Pönkhljómsveitirnar Snillingarnir, Taugadeildin og Þeyr höfðu allar á að skipa meðlimum úr Kópavogi en auk þess var starfræktur fjöldinn allur af hljómsveitum í bænum sem reglulega tróðu upp við margvísleg tilefni líkt og F-8, Dordinglar, Geðfró, Stífgrím og NAST.

Frá Kópavogi barst pönkhljómurinn og hljómsveitir voru stofnaðar víða um land. Því má segja að Kópavogurinn hafi verið vagga pönksins. Pönkæði greip um sig meðal ákveðins hóps ungs fólks og áttu Fræbbblarnir, ásamt öðrum hljómsveitum úr Kópavogi, stóran þátt í því.

Sýningin stendur til 18. desember.
Viðburðir við sýningaropnun:
• Sigurrós Þorgrímsdóttir flytur ávarp
• Ómar Stefánsson opnar sýninguna
• Dr. Gunni rifjar upp söguna
• Hljómsveitin Blóð við opnun
• Hljómsveitin HFF
• Fræbblarnir - nokkrir meðlimir
• Undirgöngin í Kópavogi
Sjá myndir frá opnuninni í myndasafni
Pönkið á Rás 1 Allir þættirnir nú aðgengilegir

Sjá myndir í Myndasafni

Dropar úr íslensku tónlistarlífi

Sat, 9 May 2009 16:37:55 +0000

Þessi sýning, sem bar yfirskriftina „Dropar úr íslensku tónlistarlífi“, stóð uppi frá 9. maí 2009 til 9. september 2009. Munirnir sem sýndir voru á sýningunni komu frá eftirtöldum aðilum.

1. Munir úr búi Árna Kristjánssonar píanóleikara voru færðir safninu til varðveislu við opnun safnsins 9. maí 2009 af afkomendum Árna. Sjá má nánar um þá gjöf á síðunni Gjafir.
2. Munir úr búi Sveinbjörns Sveinbjörnssonar. Sjá nánar á síðunni Gjafir.
3. Fiðla Björns Ólafssonar. Sjá nánar á síðunni Gjafir.
4. Ferðaharmonium Jóns Leifs. Þetta harmonium notaði Jón Leifs m.a. við söfnun þjóðlaga á Íslandi á 4. áratug 20. aldar. Fjölskylda Jóns Leifs lánaði hljóðfærið til sýningarinnar. Sjá nánar myndir í Myndasafni.
5. Munir úr safni Páls Ísólfssonar. Þeir munir voru fengnir að láni hjá Byggðasafni Árnesinga, en fjöldi muna úr búi Páls eru varðveittir þar. Sjá nánar myndir í Myndasafni.
6. Munir úr eigu Rögnvaldar Sigurjónssonar. Þeir munir voru fengnir að láni frá Geir og Þór Rögnvaldssonum. Sjá nánar myndir í Myndasafni.
7. Tónlistarhandrit. Myndir af gömlum tónlistarhandritum, svo og Grallari og tvö tónlistarhandrit fengust lánuð hjá Handritadeild Landsbókasafns Íslands, Háskólabókasafni. Sjá nánar myndir í Myndasafni.
8. Tónleikaskrár. Eins og sjá má á Yfirlitsmyndum úr sal birtust nokkrar tónleikaskrár sem stjörnuskot á vegg. Það var listakonan Sigríður Björk Ævarsdóttir sem hannaði og setti upp þessa skemmtilegu framsetningu á skránum. Þær voru gerðar á þann hátt að toga mátti í eitt hornið og opnaðist prógrammið þá upp á gátt: skyggnst inn í söguna.

Myndrænt heildaryfirlit yfir sýninguna og einstaka muni hennar má sjá undir hlekknum hér að neðan.

Yfirlitsmyndir úr sal: